Wis udakara 3 tahun ora nate ketemu karo alumni Animasi angkatan loro SMK Negeri 11 Semarang Iki. Mas Fandhi Nugroho Lufti jenenge. Alumni iki pancen duweni kepekaan kang dhuwur melu nyengkuyung dunia pendidikan. Isih kelingan rikala dheweke isih kuliah ing Poliseni Yogyakarta, tetep asring sowan ing SMK Negeri 11 Semarang saperlu urun tutur, urun rembug, urun eguh pratikel saperlu sabiyantu kanggo adi-adine ing jurusan Animasi ben bisa tambah pinter lan prigel gawe film animasi. Nek ora saka iguh pratikele dheweke, tangeh ngganggo lamun, yen murid ing jurusan iki bisa magang ing studio internasional ing Batam. Kasile, sing jenenge Echtiyar nganti ditampa dadi animator ing kana.
Ora mung semono, deweke aweh sabiyantu kanggo majune jurusan Animasi. Kolaborasi karo Balai Diklat Industri Denpasar, uga dilakoni. Kanthi kegiatan Diklat lan uji kompetensi, tansah bisa gembleng murid lan pungkasane bisa mlebu magang ana ing Brown Bag Studio, satunggale studio internasional sing mapan ing Pulau Dewata ikut.
Perusahaan Vokase kang dirintis uga melu nglatih murid-murid gawe modeling 3D. Saiki deweke nyambung rapet maneh ing SMK N 11 Semarang kanthi ditampa nganggo asto sakloro. Dina, Rebo, tanggal 30 Juli 2025, dheweke bisa pepanggihan kalian Kepala Sekolah, Bu Imroatul Azizah, S.Pd, M.Si. “Melu seneng yen ana alumni sing peduli kanggo moncere sekolah”, ngendikane kepala sekolah kang kanthi gayeng pirembagan sakloron. Katon raket banget, kabeh sarwo gathuk leh padha ngendikan babagan SMK. Apa Iki ya, sing jenenge vibrasi positif? Jagate tansah nyengkuyung.
Kaserat dening Diyarko
